بان ليا سيدي عبد السلام كا ينقل جزء من التعويذة لي كان خباها عليا 
فطرف ديال الجلد لي مديت ليه وكتب تحت منها طلاسم المثلثات الخمس 
لي كاتستعمل فالجداول المائية..
طوا الطرف ديال الجلد و بدا فالطقوس.. 

فهاذ اللحظة بدا الغراب كا ينعق وطار من شرجيم لفوق العود المثبت 
فالحيط كأنه شاف شي حاجة خاف منها..
شويا كا نشوف قط كحل سمين طلع لشرجيم.. مع أنه بعيد 
بزاف على الأرض..
وقف القط بعض الثواني وبدا كا يبركك داخل البيت.. تلفت 
سيدي عبد السلام لجهتو و هو مخنزر و ساكت..

فهاذ الأثناء كايهز سيدي عبد السلام موس صغير وابرة وكايثبتهم 
واقفيهم ومقابلين على طرف ديال الخشب و كايربط راس 
خيط رقيق بالابرة والراس الثاني بالطرف ديال الجلد لي نقل 
فيه التعويذة...إلخ
كايهبط القط لداخل البيت وكا يتوجه مباشرة ناحية الباب 
ومنو لناحية الخزانة..
بدا كا يردد سيدي عبد السلام تعويذة ما عرفتهاش.. لكن بان ليا 
كايقراها من كتاب..

"باب الكسبان لنيل ود الشيطان"

ما عرفتش علاش ما جراش سيدي عبد السلام على هاذ القط..
كان يحساب لي غادي يشير عليه بشي حاجة..
بقيت حاضي القط آش غايدير فالخزانة.. لكن مادار والو وكلس حداها..
شويا حل فمو و كشر على أنيابو فوجه سيدي عبد السلام لي 
كان يشوف فيه مرة مرة و كا يردد التعويذة..
مدة دقيقتين تقريبا و هما فهاذ الحالة..

شويا ناض سيدي عبد السلام زاد جهة الزربية ديال الصوف 
وناض حتى القط رجع اللور وهو ينقز باتجاه سيدي عبد السلام..

فهاذ اللحظة فقت أنا من النعاس مرعوب وعرقان وبديت كا نتلافت 
يمين وشمال.. ما لقيت حد بجنابي وعرفت راسي غير كنت كا نحلم..

نط هزيت القنديل لي قرب يطفى وتمشيت بسرعة من الطريق الثانية 
حتى لقيت قدامي شي دروج وتقريبا 7 درجات وطلعت منهم 
حيت ما كايناش طريق غيرهم..
ملي طلعت لقيت بويب صغير مسدود بزكروم..

حليت الباب و لقيت أغصان ديال واحد الشجرة مدليين ومغطيين ذاك 
الباب من على برا..
طبعا باش ما يكتاشفو حد..

خرجت و جريت الباب و هبط لجهة الواد..

الله أكبر الله أكبر
أذان الصبح

ما كنتش كا نعتاقد بلي غا ندوز الليلة كاملة من المغرب 
حتى للفجر عند سيدي عبد السلام.. 
ولكن ما ضاعتش حيت ستافدت منها بزاف و قدرت نقنعو
 باش نولي تلميذ ديالو..
و أيضا حصلت على البية العجيبة و المجهولة..

ضربتها بجرية حتى دخلت للدوار و كلست تحت واحد الشجرة 
مضركة نرتاح شويا حتى يخرجو الناس من الجامع..

فهاذ الأثناء كا يبان ليا جد عامر غادي للجامع و تابعو كلب..
كلب عمرني ما شفتو فالدوار، حتى مشيتو كاتبين بلي جد عامر 
ما فراسوش بلي الكلب تابعو.. 
نط من بلاصتي و مشيت من وراهم كا نتسكل.. ملي قربت بان ليا 
الكلب ما عندوش الذيل.. وصلو الدورة لي كاتدي للزنقة لي فيها جامع..
هنا ضربتها بجرية باش نبه جد عامر..
لكن ملي درت للزنقة.. بان ليا.. جد عامر غادي بوحدو..
ما تابعوش الكلب.. فين غبر ؟ 
ماكاينش منين يدخل فالزنقة

قلبت مزيان و لكن ما بان والو..
زعما نكون غير تخايلتو ؟!!

إذاً.. كلام سيدي عبد السلام على التهيؤات لي كا تجيني 
ملي كا نسمع صوت القفزات عندو فيه الحق؟!

رجعت كلست تحت الشجرة وبقيت مكابل مع الزنقة حتى بانو 
ليا الناس خرجو من الجامع ومشيت للدار دقيت على الواليدة 
حيت فهاذ الوقت كاتكون فاقت تصلي الصبح..
دقيت الباب اكثر من خمسة د المرات و صبرت شويا 
عاد سمعت صوت الخطوات كا يقربو لعند الباب..

الواليدة : شكون ؟
أنا : أيمن ألواليدة
الواليدة : "حلات الباب" فين كنتي حتى لدابا ؟
أنا : كنت عند عامر بايت عندو كيف بات عندي الليلة لي فاتت
الواليدة : ما كلتيهاش ليا.. كلتي ليا غير ما نتسناوكش للعشاء
أنا : "دخلت للدار" ما كنتش داير بحساب نبات.. غير بزز عليا.. سامية لاباس عليها ؟
الواليدة : حتى هي دارت بحالك.. ملي دخلات مع المغرب لبيتها ما بقات خرجات منو..
أنا : أنا غا نطلع نكمل نعاسي فالصالة.. بلا ما تفيقوني للفطور حتى نفيق على خاطري..

طلعت و خليت الواليدة كا تشوف و ما فاهمة والو..
مشيت أولاً لبيت سامية حليت الباب لي كنت شاك بلي غا يكون مسدود من لداخل..
لكن كان محلول و هذا كا يعني أنها خرجات من البيت مع الفجر أو قبل منو..
طليت عليها و لقيتها ناعسة و مغطية حتى وجهها..
أصلا فات الصبح لذلك ما غاتكونش شي حاجة غير عادية..

عاوت سديت الباب و مشيت للصالة و تلاحيت فوق من واحد الهيدورة 
ديال البكرة.. ونعست بلا ما نبدل حوايجي و بلا غطاء..

ضرباتني الفيقة و جاني راسي ثقيل بحال ايلا ناعس 24 ساعة.. نط 
وخرجت للمراح وانا نلقا الواليدة هي و سامية كاياكلو..

أنا : واش فات العصر ؟
سامية : "كا تضحك" لا فات العشاء..
الواليدة : على سلامتك.. خلعتينا.. عاد كلت لسامية ايلا فطرات تمشي 
تعيط للفقيه ديال جامع..
سامية : كنتي محارب الفرس والروم ؟
أنا : "ما فاهم والو" واش عاد كا تفطرو؟ نعست غير 4 د سوايع؟
الواليدة : غسل أولدي وجهك و زيد تفطر..
سامية : را محال أمي واش عارف آش وقع ليه.. خويا أيمن.. راك نعستي 28 ساعة
أنا : "غاضب" كيفاش؟!! 28 ساعة؟!! ما يمكنش..
الواليدة : عيينا ما نفيقو فيك.. فيقتك أنا وفيقاتك سامية.. وجا عامر عيا ما يفيقك 
وكا تكول ليه غير سير حتى ندوز لعندك.. 
جات الحاجة يامنة حتى هيا بغاتك تعاون ولدها فالسقي وكلتي ليها 
راك ما قاد تدير والو.. خلعتينا
أنا : اليوم أشنو ؟
سامية : اليوم الخميس
أنا : "لسامية" ونتي كي دازت عندك هاذ الليلة ؟ ياكما.. ؟ "تفكرت"
الواليدة : ياكما آش ؟
أنا : بغيت نكول ليها ياكما كاتشوف ثاني الكوابيس بالليل..

خنزرات فيا سامية و مشيت غسلت وجهي و رجعت كلست نفطر..

أنا : كان عليكم ترشوني بالما باش نفيق
الواليدة : وكن بقيتي شويا الفقيه كاع لي كنا غا نعيطو ليه.. غير ملي كلتي 
ليا البارح فالصباح خليوني حتى نفيق على خاطري.. وميكت عليك
سامية : حتى أنا تخلعت عليك و جيت طليت عليك فنص الليل ولقيتك ناعس 
وكا تدوي غا بوحدك..
أنا : "شوشاتني" خرجتي من بيتك فنص الليل ؟ علاش ؟
الواليدة : كيفاش علاش ؟ بغات تطمئن عليك
سامية : "بسخرية" باينة عليك دوزتي ليلة شاقة عند عامر.. آش كنتو كاديرو ؟
أنا : كنا كا نحرثو..

بانت ليا سامية بحال ايلا عاقت بداكشي لي كاندير.. هزيت طرف د الخبز 
فيدي ومشيت باش نخرج..

سامية : كاليك عامر دوز عندو وقتما فقتي

هبط أو وقفت قدام الباب شويا حتى كليت الخبز وسديت الباب..
مشيت جهة دار عامر باش نطركو لكن تفكرت جدو.. خاصني 
نشوفو ونتشاور معاه هو الأول عاد ندوز عند عامر.. و لكن غير بيني و بينو..
قررت نقلب عليه هو الأول جهة دار الجماعة 
لي كايكلسو فيها الناس الكبار ديال الدوار.. لكن ما لقيتوش.. 
ما بغيت نسول عليه صحابو حيت بنادم هنا فضولي بزاف وقلة ما يدار 
كا تجعل الواحد حضاي وبركاك ويخوض فالغيبة و النميمة..

وقفت شويا كا نخمم فين غايكون من غير الدار.. حيت هاذ الوقت 
ماشي ديال يكلس الراجل فبيتو حيت غادي غير يتناكر مع العيالات..
تفكرت.. جنان وعند شجر اللوز.. لي فحاشية الواد..
ضربتها بجرية حتى قربت وانا نسمع شي حد كا يعيط عليا..

الصوت : أيمن.. أيمن
أنا : "تلفت لقيتو عامر هاز معاه شي مواعن" نعام

و قفت و تم جاي لعندي، النحس هذا..

أنا : آش كادير هنا ؟ أنت داير كي التابعة
عامر : "سلم عليا" أنت لي آش كادير هنا ؟ ياك خليتك فداركم غاطس فسباتك..
أنا : "هههه" كالو ليا جيتي تفيق فيا ما بغيتش ليك
عامر : راك كا تفيق وتهدر معايا وتكول ليا سير غادي نلحق عليك 
ولكن كا تعاود ترجع للنعاس فذيك اللحظة
أنا : وا انت ما شفتيش ذيك الليلة كي دازت عندي.. كأنها 6 شهور
عامر : أجي معايا نعطي هاذ أتاي والما لجدي ونرجعو نكلسو تحت 
ذيك النخلة ونهدرو.. را شلا ما يتكال

مشيت معاه لعند جدو لي كان كا يدير طريق للما باش يوصل لشجر 
اللوز.. سلمت عليه.. حط ليه عامر أتاي والما و كاليه..

عامر : ياكما خاصك شي حاجة أخرى أجدي ؟
بركات : لا أولدي ما خاص والو
عامر : إيوا هاحنا مشينا أجدي
بركات : كلسو فين غاديين؟ ها أتاي.. بلاتيو تشربو كاس للواحد
أنا : "زربت و كلست قبل ما يرفض عامر" غادي نكلسو أعمي بركات.. 
ريحة النعناع عطات
عامر : ياك اتفقنا نكلسو بوحدنا عند النخلة..
بركات : "خوا كاس أتاي و سبقو ليا أنا الأول" هاك أولدي

شديت الكاس وشربت منو النص مرة وحدة و شفت فعامر لي كان مقلق 
وكا يحرك راسو.. كا يقصد يلاه نمشي باش نهدرو فموضوع سيدي عبد السلام ..
شربت النص لاخر من أتاي و حطيت الكاس و نط..

أنا : الله يخلف أسيدي بركات..
بركات : بصحتك أولدي..

مشينا وأنا طالع ليا زعاف حيت ضيعت الفرصة لي لقيتو فيها..
ولكن أصلا عندي بزاف ديال الأسئلة خاصني ليهم جواب من عند عامر..
مشينا و كلسنا تحت النخلة وانا نزرب على عامر بالسؤال الأول..

أنا : أشنو لي جابك ذيك الليلة لحدا دار عبد السلام مادام رفضتي تمشي معايا ؟
عامر : بلعاني ما مشيتش معاك حيت كنت متوقع غا تطرا شي حاجة غير طبيعية 
و لي تقدر تأثر علينا بزوج.. خصوصا أني شاك فنية سيدي عبد السلام
أنا :و علاش جيتي من بعد ؟
عامر : طبعا حيت خفت عليك أولا، و على الصفحات ثانيا.. حكا.. فينا هوما؟
أنا : "ضربت جبهتي بيدي" أووووه.. نسيتهم عند سيدي عبد السلام..
عامر : كيفاش حتى نسيتيهم ؟ شحال وانا نوصي فيك..
أنا : را كان قرب المارد يجي وكال ليا سير دغيا.. ما خرجتش من الباب ديال الدار 
لي دخلنا منو..
عامر : و منين خرجتي ؟ شرجيم صغير؟
أنا : لا.. كاين باب سري..
عامر : "مستغرب" فين كاين ؟
أنا : غادي نوريك كولشي.. راني وليت تلميذ ديالو وغادي يعلمني 
بزاف د الحوايج.. وهاذي فرصة باش نحط يدي على واحد الكتاب خطير
عامر : شمس المعارف نيت ؟
أنا : لا.. كتاب كايتعتابر توأم ديالو ولكن هذا أخطر منو..
عامر : أشنو سميت الكتاب ؟
أنا : سميتو "باب الكسبان لنيل ود الشيطان"
عامر : من العنوان يبان البرهان.. هذا باين عليه غا يحتوي على 
"الطلاسم المانعة و الجداول الدافعة"
أنا : آه.. دابا كول ليا.. علاش طلقتي ذيك الغوتة كاملة ملي كنتي تحت الشرجيم ؟
عامر : ..

يتبع

بانتظار تفاعلكم و آراءكم و انتقاداتكم..

no_sidebar