رجعت خديت القنديل من فوق الباب القزديري ومشيت ضويت على 
الحيط لي فيه السدة باش نشوف واش كاين فيه ثقابي نطلع منهم..

ضويت وبانو ليا 7 ثقابي مبعدين شويا و سطحيين.. ما يطلع منهم 
غير لي خفيف وموالف..

حطيت القنديل وحوايجي الفازكين وقررت نطل على السدة بسرعة قبل ما 
يسالي سيدي عبد السلام من طقوس تقديم القربان لي تقدر تنتاهي فأقل من ساعة..
مديت يدي باش نطلع الخطوة الأولى.. لكن..
البركاك ديال الغراب طلع ودخل من الباب القزديري ومشى وقف فشرجيم 
لي حطيت فيه جلد الذيب.. حضاي..

مزيان الأفضل ملي دارها من الأول..
رجعت اللور هزيت القنديل ورديتو بلاصتو وخديت الحوايج وخنزرت فيه..
كملت طريقي..

خرجت لجهة الواد وسديت الباب وتمشيت حتى فت الدوار لعند واحد الشق 
بين زوج جبال ونشرت الحوايج فوق من الصخر ورجعت بالجري للدوار..
وصلت حدا دار الجماعة وأنا نتلاقا عامر وجدو خارجين منها.. عيط ليه..

أنا : عامر.. عامر

قربت عندهم..

بركات : ياكما تخلعتي أولدي قبيلا ملي هدرت ليك على حراس الكنوز؟
أنا : "ما خصنيش نطول معاه الهدرة" لا أعمي بركات.. تفكرت واحد سخرة 
داكشي لاش مشيت بزربة
عامر : ياك كلت ليك ملي نسالي غانجي لعندكم؟! علاش ما تسنتنيش؟
أنا : زيد معايا را ما بقاش الوقت.. حتى للدار و نعاود ليك
بركات : فين غاديين ؟
عامر : غادي نمشي معاه للدار أجدي.. حتى لوقت العشاء ونرجع
بركات : واخا أولادي.. الله يوفقكم
بزوجنا : آمين

مشينا بزربة للدار ..

دقيت الباب و هبطات الواليدة حلات لينا..

أنا : فين سامية ؟ سدات ثاني عليها فبيتها ؟
الواليدة : لا.. مشات مع خالتك لعند الحاجة يامنة يعاونوها.. حتى أنا 
غا نمشي دابا.. كنت كانتسناك غير انت

دخلنا للدار وسديت الباب.. وبغات الواليدة تطلع..

أنا : بغيتي ملحافك أمي ؟ غير بقاي أنا غانهبطو ليك

طلعت دغيا هبط ليها الملحاف وحلات الباب..

الواليدة : را الخبز والعصيدة فالكوزينة.. ايلا صليتو العشاء فجامع 
ورجعتو تعشاو.. حنا نقدرو نتعطلو..
أنا : و سامية غاتبقى معاكم ؟
الواليدة : أييه

خرجات وسديت الباب وطلعنا أنا وعامر ودخلنا كلسنا فالصالة..

عامر : أشمن طريقة وراك داك الشيباني؟
أنا : كاليا نقراها ليها فبيتها 15 مرة ومن بعد نغطسها فدلو ديال الما 
ونرش بيه البيت..
عامر : ياكما نسيتي شي حاجة؟ لا نصدقو محضرين جن آخر ونكملو لي خاص..
أنا : "ههه" ما تخافش.. راني وليت مريد ديال سيدي عبد السلام.. 
واليوم خديت الإذن.. وزيدون را فيك البركة و تعويذة الإستنصار..
عامر : واش تسطيتي !! الإذن ديالاش ؟
أنا : الإذن ديال شيخي بموافقة عفريت من بعد ما قدم ليه قربان..
عامر : صافي مشيتي فيها.. غا تبقى متبعو حتى يتقوس ظهرك بحالو..
أنا : نوض نديرو داكشي لاش جينا..

نط مشيت للحمام خديت دلو وعمرت نصو بالما وديتو لبيت سامية وجبت 
تعويذة "الألفة" وشعلت القنديل..

أنا : عامر.. أجي للبيت.. را قرب المغرب..

جا عندي عامر وكلسنا بزوج مقابلين مع بعضنا مربعين رجلينا..

أنا : غانبدا دابا.. رد معايا البال
عامر : غا زيد طلقنا
أنا : دمت.. لها.. لك طائعة.. ك في كل.. وكبيرة.. يا سيدي.. ها.. لك..الخ

كررت التعويذة 15 مرة وقلبت طرف ديال الجلد وحطيتو فالما وجعلت الكتبة 
من الداخل..
عامر : شحال ديال الوقت غا تغطسها فالما ؟
أنا : ما كالش ليا.. ولكن أغلب الظن حتى تمحى الكتبة من الجلد حيت من الصمغ

غطست الجلد 3 المرات من بعدما رطاب وفركتو شويا وعاوت خليتو فترة قصيرة 
وقلبتو.. فعلا تمحا الصمغ ونط نرش بيه البيت..

أنا : نوض خرج.. غانرش البيت دابا باش ينشف قبل ما ترجع سامية..

ناض عامر خرج وبديت كا نرش الما حتى ساليت ورديت الدلو للحمام وخديت 
طرف ديال جلد حطيتو فجيبي.. وخرجت عند عامر..

عامر : ساليتي ؟
أنا : آه.. قرب يؤذن.. خفت غير لا ما تجيش سامية دابا وتوقع شي حاجة غير 
طبيعية عند الحاجة يامنة و يصدقو مخلوعين..
عامر : سير جيبها.. وكول ليها راك بغيتيها تونسك فالدار
أنا : ايلا جات بوحدها ما غانبغيش نخليها.. حيت أنا خاصني نخرج..
عامر : فين مازال غا تخرج ؟ بقى معها رد ليها البال حتى للصباح وسير فيما بغيتي
أنا : زيد نمشيو لعندهم بيما نلقى شي فكرة أخرى..

خرجنا ومشينا جهة دار الحاجة يامنة.. وقفنا شويا.. وانا نتفكر خطة نقنع بها 
سامية باش تمشي للدار هي و الواليدة..

عامر : أنا غا نمشي للدار
أنا : فين زربان ؟ ياك كلتي لجدك حتى لمن ورا العشاء عاد ترجع للدار؟
عامر : حيت يحساب لي غا نتعطل ثاني.. بغيت نتخبى على حسام لا يكول ليا 
نعاونو غدا حتى هو
أنا : واخا.. سير

مشى عامر لدارهم وانا ندق الباب.. حل حسام و ملي شافني دخل و خلاني واقف 
بلا ما يسولني آش بغيت..
دخلت و عيط على الواليدة..

أنا : الواليدة.. والواليدة
يامنة : زيد أولدي دخل..

دخلت لعندهم للبيت لي كانو خدامين فيه..

الواليدة : مالك آش كاين ؟
أنا : جيت نكول ليك تكلمي لواحد السيدة كا تسول فيك
الواليدة : شكون هاذ السيدة وعلاش ما جبتيها معاك لهنا ؟ ياك عرفتيني ما مسالياش؟
أنا : كالت ليا بغات...

يتبع

سؤال هاذ الجزء :

آشنو فنظرك غا تكون بغات المرا لي كال أيمن بلي جات كاتسول 
مو مع أنها غير كذبة ؟؟

بانتظار تفاعلكم و آراءكم و انتقاداتكم..


no_sidebar