مزلوف : "ههه" ما طلبتي غير الموجود.. غا نركب البغلة ونمشي 
لعند العطار فدوار "ويسفال" نجيبو من عندو.."ههه"

أنا : واخا.. دابا نشوفو واش غا تدركو ولا لا.. المغرب قرب


دخلنا للدوار ومشى مزلوف كا يجري لدارهم باش يخرج البغلة 
وأنا و كريميطة دخلنا من الزنقة لي فيها البير.. 
بان لينا سي الكرواعي واقف هو و بافرو والإمام كا يطلو على البير 
و طلعو منو الحبل المقطوع.. دزنا من حداهم..

أنا و كريميطة : السلام عليكم

سمعنا غير الإمام..

الإمام : و عليكم السلام و رحمة الله

هز سي الكرواعي راسو و شافنا..

الكرواعي : عدنان.. توفيق.. أجيو أولادي

ههه.. أول مرة نسمع شي واحد يعيط على كريميطة بسميتو الحقيقية.. 
كريميطة غير لقب لصقوه فيه دراري ديال القبيلة..
قربنا للبير و سلمنا على سي الكرواعي و بافرو و الإمام..

الكرواعي : كولو ليا.. ما عرفتوش شكون لي قطع هاذ الحبل وخدا الدلو ليلة البارح ؟
أنا : لا أسي الكرواعي
كريميطة : إمتا لقيتيه تقطع أسي الكرواعي ؟ بالليل و لا غير اليوم ؟
الكرواعي : غير هاذ الصباح.. حنا شاكين يكون داه شي واحد من الدراري 
لبرانيين لي حضرو للعرس بالليل
أنا : ماشي بعيد.. لكن واش متأكد بلي الدلو تسرق ماشي يكون غير طايح فقاع البير؟

شاف سي الكرواعي فبافرو و الإمام..

بافرو : وعلاش لي قطع الحبل غا يخلي الدلو ايلا ما كانش غراضو فيه ؟
الكرواعي : طبعا الحبل صحيح و من النوع الممتاز لهذا ما يمكنش 
يثقل عليه الدلو و يتقطع بوحدو
الإمام : القضية و ما فيها هي أن الفعل ليه فاعل.. لكن من المحتمل يكون هاذ 
الفاعل إنسي، وكذلك من المحتمل يكون جني من بعد الحادثة لي سبق 
ليها وقعات مع الحاجة
بافرو : يعني خاص ترقي البير أسي عبايد
الإمام : الدار والبير خاصهم بزوج السلكة ماشي غير الرقية.. يعني يجيو 
الطلبة يقراو سورة البقرة والملك ويس وصغار السور الى سورة الناس 
ويقراو الهمزية ويديرو الدعاء.. و تحضر البخور
الكرواعي : ايوا تكلف بالطلبة اسي عبايد وأنا غادي نوصي الحاجة تجيب 
لي يوجد ليها العشا مازال الليلة
بافرو : والبخور على حسابي
الإمام : مزيان.. الله يسخر
الكرواعي : "لينا" حتى نتوما جيو حضرو للسلكة تقراو مع الطلبة وتعشاو معاهم

مشينا أنا و كريميطة لي كان حابس الضحكة..

أنا : إن شاء الله أسي الكرواعي.. "لكريميطة" مالك كا تضحك من كرشك ؟
كريميطة : "ههه" ما سمعتيهش كال ليك جيو تقراو مع الطلبة فالسلكة ؟
أنا : نقراو ليه "الطائر الجني ملهم البوني".. مسكين "ههه" 

وصلنا قدام باب دارنا و كال ليا كريميطة..

كريميطة : أنا أش غا نجيب معايا ؟
أنا : أنت براسك بلا ما تجي
كريميطة : "خنزر فيا" بلا ما نجي ؟ من نيتك ؟
أنا : أييه.. من نيتي.. انت لا يعول عليك.. البارح خليتك ورا الدار وفرمشة 
عين لقيتك غبرتي..
كريميطة : ملي تخبيت تما سمعت شي واحد جاي داكشي لاش نقزت من السور 
لا يكون عمك زمراك
أنا : غير أنا هذاك.. خذيت الغانجو عطيتو ليه.. المهم.. جيب معاك..

الله أكبر الله أكبر
أذان المغرب

أنا : واش تقدر تصيد شي غراب فهاذ الوقت ؟
كريميطة : غراب ؟! و دابا ملي غربات الشمس ؟! مالك أخويا غادي تعرض 
على ابليس شخصيا ؟
أنا : ياك كلت ليك هاذ الليلة ما غا تكونش ليها بحال ديال البارح ؟

فهاذ اللحظة جاي خويا اسماعيل..

اسماعيل : السلام عليكم.. أش كاديرو نتوما هنا ؟ ما مشيتوش تصليو ؟
كريميطة : أنا غادي نيت للدار دابا نتوضا

مشى كريميطة..

أنا : ما تنساش تجيب معاك الضحية لي كلت ليك ولا بلا ما تجي
اسماعيل : الضحية ؟ ديالاش ؟
أنا : لا والو.. كنت وصيتو غير على حمامة باش نزردو غدا بالليل
اسماعيل : ايوا سير توضا فالجامع.. انا راجع ليه دابا.. ما تغبرش 
حيت سي الكرواعي داير السلكة عندو فدارو وعارض علينا للعشا باش
 نقراو مع الطلبة
أنا : غاندخل نشوف امي عاد نمشي للجامع

دخلنا أنا و اسماعيل للدار.. هو طلع لبيتو وأنا دخلت للكوزينة 
ما لقيتش امي و طلعت ديريكت لبيتي فالسطح.. 
حليت البيت وحليت الماريو و جريت المجر.. جبدت منو طرف صغير ديال 
جلد الثعلب وطويتو حطيتو فجيب الفوقية و سديت لماريو..
هبطت للطابق الأول تلاقيت اسماعيل خارج من بيتو هاز فيديه بيدو 
ديال 5 لتر ما عرفتش أش فيه.. 
شافني اسماعيل و خبا البيدو وراه..

اسماعيل : مازال ما مشيتيش تصلي ؟
أنا : و أنت معفي منها اليوم ؟ أشنو كاين فذاك البيدو ؟



يتبع

بانتظار تفاعلكم و آراءكم و انتقاداتكم..

no_sidebar