أنا : التسليم بالطاعة والوعد بالتنفيذ لازم يتم يا المأمور بتقريب المحظور 
و فضح السر المدفون بين رباب و الكتاب المقرون 
بالعلوم النفيسة المكونة للساعات التعيسة 
في الليالي النجمية المضيئة للعوالم السفلية
صاموي.. : أمرك تأجل.. و موعد صرفي قد تعجل.. ولا طاعة موجبة
بعد حضور سيدي القائد و مولاي الآمر.. سيدي "شمهطاش"

فهاذ اللحظة طار الغراب خرج من البيت وأنا حاضيه حتى بعّد
وعاود درت لعند كريميطة وهو.. يتهز بقوة و تخبط على كرشو..
ماشي بعيد يكون تصرف "صاموي.." بسباب ما ذكر لكن خلاني
فحيرة من أمري حيت ما صرحش بالمكان لي مخبية فيه رباب
الجزء الرابع المختفي من كتاب..
"باب الكسبان لنيل ود الشيطان"
وكمالة ثلاثة أرباع لي عندي.. وما أكدش ليا على وجود "شمهطاش"

القضية شميت فيها ريحة الإبطال العام و الغير موجه..
يمكن تكون السلكة لي داير سي الكرواعي هي لي وصلت بركتها 
لهاذ الخربة واخا أن صوت الطلبة ما مسموعش هنا..

ولا.. ؟! لا.. لا ما يمكنش.. زعما تكون رباب وجهات شي تنوعيرة..؟

دخلات ليا هاذ الزواق الوسواس لراسي.. وهي أصلا ما عارفانيش
جاي للخربة باش نستحضر السفليين.. آاااه.. ماشي بعيد..
مادام كا تعامل مع "شمهطاش" بشكل مباشر و بدون وسيط..
وتشت على ركابيا مشيت كا نحبو لعند كريميطة مسكين لي تجمع عليه النحس هاذ الليلة بسبابي..
أش جا ما يفكني معاه ملي يفيق و يعقل..

وصلت حداه و قلبتو على ظهرو وهو ي.. تقيا عليا.. أووووف..
زيد طلينا حتى انت.. حتى بيدو ديال الما ما جبناه معنا..

عطيتو زوج تصرفيقات ملاح وتحنيت شديتو من فوقيتو ونخضتو مزيان
وزويتو لكرشو.. شويا.. ناض نيشان وقف مخلوع وطلق غوتة بكل جهدو..

كريميطة : ربااااااب.. طلقي مني.. ربااااااب.. ردي ليا ظفري..

تلفت كريميطة جيهتي شاف فيا وهو غضبان..
كانو عينيه حمرين عكس كبيلا كانو بيضين لكن هاذ المرة رجع مومو الكحل..

جا كريميطة يقرب ليا هاز يديه بحال ايلا ناوي يقجني..
رجعت اللور حتى لصقت بالحيط وأنا كا نشوف فالنجمة الخماسية حيت أمامي
حل واحد وهو الإبطال.. وهذا كا يستوجب مني نطيح الشمعات بخمسة
ونرون بلاصتها بالتراب عاد نقرا تعويذة الإبطال..

كريميطة تقاس مسكين وخاصني نربطو ونحقق معاه فذاكشي لي شاف
باش نحل لغز الغوتة لي نطق فيها بسمية رباب عاد نمحي ليه
هاذ الذكرى و أحداثها من دماغو باش ما تأثرش عليه مستقبلا..

لهذا..
غفلتو تحنيت حتى فتو وعكلتو طاح ومشيت طيحت الشمعات بربعة
وهزيت الشمعة لي بقات شاعلة وخرجت من البيت خذيت شويا ديال التراب
ورجعت خويتها على أثر النجمة الخماسية..
فهاذ اللحظة ناض كريميطة و جا بزربة لعندي لكن قبل ما يوصلني..

يتبع

بانتظار تفاعلكم و آراءكم و انتقاداتكم..

no_sidebar